كلمات من الشاعر المميز بوبكر زفزافي

كتب الشاعر المميز بوبكر زفزافي هذه الأبيات
ابقاي علاخير ياهاذي العشة*** من اليوم ماعدت نجيك
مقرنص فوقك قاطير ترشة*** ولى غراب حايم عليك
قفرة فيلبر والملامح دقشة *** لاطير يعلبب يتمرح فيك
راحت ناسك ليهم وحشة *** وجاوك ناس ماهم اماليك
زقليش المقدر زادني قبشة*** وكدر خاطري هضوم عليك
ولانقول هذا ثرث الكرشة*** عفن برك ماعدتش نساميك
نقطع البر علاظهر الجحشة*** نقدا مباري مانصدش ليك

فجاريته وأنا ألهث وأتصفد عرقا في ارتجال
قلت اليوم انجي ليك نتعشا=خاطري مزيلف نمشي عانيك
قلبي فرفر هارب كي نتمشا=نعت قمري حامل جواب يساميك
نتلاطم في بحر الشعر كي القشا=صابر قلبي صد يلاجي للمليك
القليب إذا ضاق لازملو رشا=قلت ابكر صاحب نتونس بيك
معروف من سردون حتى لحرشا=اسمك في لوطان يشهد اعليك
ولد الشرفا عايش في فرشا=الضحكة والبسمة سيما ما تخطيك
أنت حبيب و ديماا ليك وحشا=ما ظنيتش بالمرة نصبر اعليك
الجود خصلة تبان من رمشا=كريم و الضيف يغدى ماشي ليك
قصدي الكرما ما هومش الكشا=بيوتهم مفتوحة ولاد نايل مواليك
فرسان سلاحهم فليد ما يرشى=سلاكين المضيوم شرفا مماليك
اهل ملفوف الكبدة معاها الكرشا=طعام مسقي مفتول ما يلقيك
فاتلينو حراير مجمولات في كمشا=خلاخل والحنة بالفرحة اتلاقيك
قوادري جاب القول في رعشة=السكنى زنينة يامن تسـأل هاذيك
نختم بالصلاة على زين الممشى= ربي يرحمني ويرحم والديك